主頁 >

列印此頁




運動員見證

曾慕梨
運動項目:籃球
效力球隊:香港代表隊
位置:得分後衛
身高:1.70米
體重:54公斤
所屬教會:尖沙嘴浸信會
退役日期:2004年

哈囉!我叫Dilia,中文名曾慕梨,返尖沙嘴浸信會。由於讀一個由「體育事工聯盟」同「浸信會神學院合辦」的「基督教康體事工證書課程」,認識了導師Johnny;有日,佢突然叫我寫一篇個人見證,話要登在「體育事工聯盟」的見證集網站,為主作見證。這個突如其來的邀請,令我又驚又喜!喜的當然係可以藉此見證神的榮耀;驚的就係自己的中文書寫能力,怕未能完整表達出神的榮美同恩惠。

我好細個就開始打籃球,而且熱愛程度有加無減。中五畢業的時候,己經係青年會的成員,心中己再無諗住繼續讀書;但係年紀又細,所以亦都無搵工,日日都只係諗住打波。整個暑假好快就過去,朋友個個唔係返工就返學,只有我整日練波。當時真係好沉迷,毫無理性可言,連中心的職員都睇唔過眼,勸我唔可以一世都打波,要為將來前途打算一下。不過,佢最終都主動介紹我去打青年軍,後來重打過幾支女子甲組隊同香港代表隊呢!就算結婚後,我都重係咁熱愛打籃球,記得初次懷孕的兩個月,仍然繼續練波及比賽,最終爭奪聯賽錦標後才給隊友發現,被鬧到七彩咁!

直到去年,教會有個「康體主日」, 牧師請我向會眾作見證。當我預備的時候,驚覺自己雖然信主十年,但好似無幾多神的經歷可以同人分享,一生中只有籃球,反而神就無咁重要。我當時覺得好慚愧,好內疚,好傷心!真係萬分對神唔住,因為神在十字架上為我的罪受死,又比我打波的恩賜,得到神種種的恩惠,但自己卻無乜為神做過一件事,真係好虧欠呢!所以我就係眾人面前承認自己的不配,又重新立志,要係靈命上札好根基,係生活中見證神。感謝神,自我同神立下新志後,神就立即有回應,牧師當日同我講要推薦我讀「康體事工課程」,裝備我將來在教會有事奉機會。嘩,真係一個信實既神呀!令我好感恩。這樣就讀了康體事工課程,而且在學習當中,神令我明白到運動都可以為祂工作,如何做一個基督徒的籃球教練,藉此向隊員傳福音,用身體力行去以生命影響生命,見証耶穌基督的愛。通常運動員的生涯去到三十歲就要終結,當然我也不倒外,但好感謝神,我打了十幾年籃球,卻沒有白費時間,今日神用我的興趣及恩賜去為祂去作工,我可以繼續熱愛打籃球,也可以傳揚神的愛。











軟件下載
相關網站
網站指南
聯絡我們